Որքա՞ն հաճախ լվանամ մազերս

Աշխարհն աշխարհով, մենք՝ աղջիկներս՝ մեր մազերով եւ դրանց անվերջ խնամքով 🤭 Որքա՜ն կարեւոր հարցեր կան, որոնց պատասխանները խիստ զբաղված լինելու պատճառով չենք հասցնում ստանալ։

Որքա՞ն հաճախ լվանամ մազերս։Բոլորս էլ լսել ենք, որ հաճախ լվացումները վատ են անդրադառնում մազերի որակի վրա եւ վնասում են դրանք։ Դե եկե՛ք պարզենք, թե շաբաթը քանի անգամ կարելի է փրփրեցնել մազերը եւ զգալ այդ անուշ մանգոյի հոտը: 😊

Նախ եւ առաջ, հասկանանք, թե ինչ է անում շամպունը մեր մազերի հետ.

• Շամպունը մաքրում է գլխամաշկը բակտերիաներից եւ կեղտից
• Շամպունը հեռացնում է գլխամաշկի բնական յուղը, որը սնուցում եւ փայլ է հաղորդում մեր մազերին։

Մասնագետները պնդում են, որ մազերը պետք է լվանալ այն ժամանակ, երբ զգում ես դրա կարիքը։ Եթե նայում ես հայելուն եւ տեսնում ես գլխիդ կպած յուղոտ մազեր, պետք չէ մտածել ՝ լա՜վ, այսօր էլ դիմանամ։ Դիմացիր բարեկամներիդ ամուսնանալու կամ երեխա ունենալու մասին դիտողություններին, այլ ոչ յուղոտ մազերով աշխատանքի գնալուն՝ հույս ունենալով, որ ճանապարհին խնամված եւ միշտ հարդարված կուրսեցուդ չես տեսնի։😄

Հիշի՛ր, որ լվանալու հաճախականությունը շատ անհատական է։ Մեծ դեր է խաղում մազերի որակը։ Օրինակ՝ գանգուր, հաստ եւ խիտ մազերի դեպքում պետք է լվանալ 5-6 օրը մեկ, քանի որ ճարպը ավելի դանդաղ է տարածվում գլխամաշկի վրա։ Սակայն բարակ եւ ուղիղ մազերի դեպքում անհնար է պահել այդ հաճախականությունը, ավելին՝ դրա կարիքն էլ չկա:

Մազերը լվանալու հաճախականության վրա ազդում է կենսակերպը, քրտնելու ինտենսիվությունը, մարզասրահ կամ լողավազան հաճախելը, տաք գործիքներով հարդարումը եւ ֆիքսող նյութերի օգտագործումը։

Այդ պատճառով մի՛ սահմանիր, թե շաբաթական քանի անգամ ես լվանալու գլուխդ։ Պարզապես ստուգիր՝ արդյոք մազերդ արդեն յուղոտ են, թե ոչ։

✿ Եվ վերջում մի քանի խորհուրդ ✿

• Ընտրի՛ր հենց քո մազերին համապատասխան շամպուն՝ յուղոտ, չոր, ներկած, թափվող մազերի համար եւ այլն։
• Անպայման օգտագործիր խնամող բալզամներ եւ դիմակներ։
• Մազերդ լվա մինչեւ 40 աստիճան ջրով, իսկ վերջում ցայիր դրանք սառը ջրով․ մազերդ գեղեցիկ փայլ կստանան։
• Քիչ քանակությամբ շամպունը մատների փափուկ հատվածով մեղմ մերսելով տարածիր գլխամաշկիդ վրա մոտ մեկ րոպե։ Մեծ քանակով շամպունը կչորացնի եւ կվնասի գլխամաշկդ։
• Բալզամը եւ կոնդիցիոները նախատեսված են մազերի ծայրերի համար։ Խուսափի՛ր դրանք արմատներին քսելուց։

Իսկ դու ի՞նչ գաղտնիքներ ես բացահայտել մազերի լվացման հետ կապված։ Կիսվի՛ր քո փորձով մեզ հետ։